LEGAZPI CITY – Kinumpirmar kan Civil Aviation Authority of the Philippines (CAAP) na uminabot sa 10 flights sa Bicol International Airport (BIA) an naapektaran asin sinuspinder kasuhapon huli sa sarong ‘bomb joke’ sa sarong eroplano kan Cebu Pacific paduman sa Manila.
Sa imbestigasyon kan CAAP asin kan mga otoridad, igwa su boot ning note na naglalaog nin bomb joke sa lavatory o lababo kan nasambit na eroplano.
Naapektaran kaini magin an mga papaali asin minaarabot pa sanang eroplano kan Cebu Pacific sa nasambit na eropuerto.
Durante kaini, pinababa an mga pasahero asin saro-saro na ininspeksyon kan Aviation Security Canina Bomb Disposal Units asin PNP Aviation Security Group an gabos na mga bagahe asin hand carry items.
Apwera kaini, saro pang eroplano kan Philippine Airlines na padigdi kuta sa Bicol an dai na pinadagos asin pinabalik sa Manila huli kan insidente.
Mientrastanto, maigot ining pigkokondenar ni Albay Governor Atty. Edcel Grex Lagman.
Sa saiyang Facebook post, sinabi niyang bako gabos na jokes makaulok orog na kun bomb jokes sa laog nin eroplano huli ta public safety an nakasalalay digdi.
Siya mismo, nakikipagtabangan na su boot sa CAAP ngareg madakop asin mapanimbag an mga may responsable sa bomb joke na ini.
Mantang nagpapadagos an imbestigasyon, pigsyerto niya na matao siya ki tabang legal nganing matawan nin padusa an mga kagibo kaini.
Mientrastanto, tulos man na nagbalik an operasyon kan eropuerto.