Gi-imbestigahan na sa otoridad ang hinungdan sa pagkasunog sa 10 ka panimalay nga miresulta sa pagkamatay sa usa ka batan-on diha sa Purok 3B Barangay Gusan ning syudad sa Cagayan de Oro.
Sigun ni Fire Senior Inspector Willie Tan Jr, Chief Operation sa Nazareth Fire Station nga padayon pa ang pag-establisar nila sa mga anggulo may kalabutan sa sunog nga nahitabo kaganinang buntag.
Una na niining gibutyag nga alas 8:54 nadawat nila ang impormasyon sa sunog, ug alas 8:59 sila naka-responde, alas 9:33 na-under control ug alas 10:23 gideklara nga fire out.
Gi-angkon sa City Fire District nga nalangan sila gamay sa pag-responde sa area gumikan sa pipila ka factors diin lakip niini ang mga wire sa internet connection ug mga humps sa dalan.
Sa 10 ka panimalay nga nasunog, 7 niini ang totally damage ug 3 ang partially damage.
Muabot sab sa 1.2 milyon pesos ang damyos sa sunog. Kahibaloan nga bag-uhay lang gikuha na ang patay’ng lawas sa batan-on nga nailang si Bryant Kent Jokiton, 17-anyos.