LAING 109 ka mga miyembro sa KaBrigadahan GenSan ang natabangan niadtong Sabado sa ilang panginahanglanong medikal, pagpalubong ug tambal, asa mokabat sa dul-an P400,000 ang natigom ug gibahin bahin sa mga nagkinahanglan nga miyembro.
Alayun niini, hugot gipasalamatan ni Brigada Ymeir Shann Catulpos ang mga mihatag sa ilang tabang alang sa mga benepisyaryo nga mga miyembro.
Lakip sa natabangan si Jade Rosalejos, 22-anyos alang sa amahan nga bedridden tungod sa daghang sakti ingon man si Maricel Hassan alang usab sa may sakit nga kabanay.
Nagpasalamat usab si Dolores Ilarde, 58-anyos taga Purok Balunto, Labangal alang sa tabang sa pagkamatay sa inahan nga 89-anyos.
Pulos usab nila gipasalamatan si Brigada Elmer V.Catulpos sa pagmugna sa KaBrigadahan GenSan tungod natabangan sa ilang panginahanglan.
Dungan niini, giawhag ni Brigada Shann ang mga katawhan, miyembro o dili sa KaBrigadahan batok sa nagapakatag og text nga gigamit ang pangalan sa KaBrigadahan aron mangilad.
Pinaagi sa paghangyo sa pagtabang og P1,500 pinaagi sa pagpadala sa remittance center o Gcash ug bayloan kini og P20,000.
Ang maong modus matud pa ang dili iyaha sa KaBrigadahan ug gigamit lang ang pangalan ug i-report ngadto sa opisina o sa hotline sa KaBrigadahan nga 0936-146-6197.