Arestado ang isa ka mister matapos nadakpan nga nagatransport sang sinako nga mga uling kag wala sang mapakita nagakaigo nga dokumento takna alas 8:00 sang gab-i, Nobyembre 3 sa Barangay Poblacion Norte, Ivisan, Capiz.
Ginkilala ang nadakpan kay alyas ‘Don’, 48 anyos, kasado kag residente sang Brgy. Maloclo Norte sa nasambit nga banwa.
Nakuha sa paghinakop sang akusado ang 12 tanan ka sako sang uling nga nagabalor tanan sang P6,000 nga nakasakay sa may sidecar nga motorsiklo nga Kawasaki Barako.
Natigayon ang nasambit nga operasyon pinaagi sa gintingub nga pwersa sang Ivisan PNP sa pagpanguna ni PMAJ Ruby Magallanes, DENR kag CENRO sa pagpanguna ni Forest Ranger Romeo Coronado.
Magapangatubang sa pagbayolar sang Sec 77 sang Presidential Decree 705 ukon ang Forestry Reform Code of the Philippines si alyas Don.
Sa karon, nagapabilin sa kostudiya sang DENR CENRO ang nadakpan kag mga para sa nagakaigo nga disposisyon. | KMD Gicalde