LEGAZPI CITY – Uminabot sa 12,000 katawo an mga nagpartisipar sa isinagibong Night Color Run sa banwaan kan Pio Duran, Albay kan nakalihis na Marso 9 katakod kan pagselebrar sa ika-60 taong anibersaryo kan pagigin independienteng banwaan kaini.
Sa intrevista kan Brigada News FM Legazpi kay Pio Duran Municipal Disaster Risk Reduction and Management Office (MDRRMO) head Noel Orduña, sinabi kaini na walong aldaw an schedule ninda para sa mga aktibidad katakod kan anibersaryo kasabay man an pagselebrar sa ikaduwang taon kan Tinapa Festival.
Segun saiya, very challenging sainda an Night Color Run nin huli sa kadakol na mga partisipantes, alagad tinawan-doon ni Orduña na zero injury an banwaan sa nasambit na aktibidad.
Apwera digdi, kinondusir man an Drum and Lyre Corps kan Lunes asin nabigla sinda huli ta nasa poko mas omenos 7,000 katawo an mga nag-atendir.
Ngunyan an aldaw, isasagibo su boot an wreath-laying asin 21 guns salute komo pagtaong onra sa founder kan banwaan na si Pio Salvador Duran.
Segun pa saiya, nasa linyada man an ‘Bangkarera’ sa Marso 14 sundo 16, kun sain piglalaoman an dakol na mga partisipante hale sa ibang mga rehiyon kan Pilipinas.
Mientrastanto, apwera sa mga ini dakol pa an mga nakalinyang aktibidad katakod kan mga nasambit na selebrasyon.