Ginabanta nagdangat sa 156 ka mga panimalay ang ginlamon sang kalayo sa Rizal Street, Brgy. VII, Roxas City kahapon nga adlaw sang Martes, Pebrero 27.
Sa interview sang Brigada News FM Roxas kay SFO4 Terrence A Himan, Chief Operation Officer sang Bureau of Fire Protection – Roxas City, iya ginpahayag nga ang nasambit nga numero sang panimalay nga nasunog ang sandig man sa datos nga ila nakuha gikan sa Department of Social Welfare and Development (DSWD) sa syudad.
Ginkumpirma man sini ang mga napatay nga sanday Nenita Villaruz, 66-anyos, isa ka pwd kag Nestor Clarito, 78-anyos.
Suno kay Himan, napatay si Villaruz bangud wala makaguwa sa iya puluy-an kay ini ang nagaisahanon lang kag indi makalakat samtang si Clarito ang nakaluwas na kuntani apang nagbalik pa sa iya puluy-an matapos may nalipatan nga gamit kag ini ang na-trap sa sunog.
Dugang pa sini, nabudlayan ang mga katapo sang bumbero nga magpalong sang sunog bangud human sa light materials ang mga panimalay rason nga madasig naglapta ang kalayo.
Nahibaluan nga anom ka mga fire station ang nagresponde sa sunog ini ang ginalakipan sang Ivisan, Sapian, Sigma, Panay, Panitan kag Pontevedra.
Ginpahayag ni Himan, nga antes sila nagbiya sa lugar ginsigurado gid nila nga wala na sang kalayo.
Sa karon, wala pa sang pinal nga imbestigasyon ang katapo sang BFP-Roxas City bangud malapad ang area sang nasunogan, rason nga indi nila gilayon matumod ang gintunaan sang kalayo kag kun pila ang kahalitan. | Judy Ann Juare