Nasalbar ang 19-anyos nga lalaki nga padung untang molayat kaganihang buntag sa Marcelo Fernan Bridge human napugngan kini sa ginganlang Dominic Cabaluna ug si Cg Sn2 Charlie Inot nga maoy unang nakaresponde sa maong panghitabo.
Nasuta nga ang maong lalaki nagpuyo sa Tabok, Mandaue ug padung unta nga mo layat sa bridge.
Matud sa fire investigator nga si FO3 Jeffrey Gerodiaz, alas 8:47 kaganihang buntag sa dihang nakadawat sila sa alarma sa panghitabo dali kini nila nga gi-respondehan kauban nagkadaiyang rescue teams sa dakbayan.
Saysay ni F03 Gerodiaz nga niangkon ang maong 19-anyos ngadto kanila nga wala na siya sa iyang saktong panimuot sa dihang gibuhat kini tungod sa giatubang nga problema kabahin sa iyang live-in-partner dala na usab sa problema sa pamilya niini.
Matud niya nga mga ala una sa kaganihang kadlawn, nasakpan niya ang iyang uyab sa pikas kwarto sa ilang gipuy-an nga naay nakapatong nga laing lalaki.
Sa dihang gi kompronta kini niya kaganihang buntag, dili kini motingog nga maoy nahimong hinungdan nga nakahuna-huna kini’g dautan.
Tungod kay wala na siya sa iyang saktong panimuot, nilakaw kini padung sa taytayan ug nagdahum nga gisundan siya sa iyang mga barkada nga iyang gilauman nga mopugong kaniya apan wala siyay barkadang nakita nga nagsunod hinungdan nga nakadesisyon kining molayat.
Sa wa pa kini niya mabuhat, kalit nalang nga adunay nigakos kaniya nga maoy nakasalbar kaniya sa maong sitwasyon ug nabalikan siya sa iyang panimuot.
Gidala na ang maong lalaki sa tambalanan aron mahatagag pagtagad ang medical nga panginahanglanon niini. | Kristyl Joy Felerca