NAABO sa pagdilaab sa sunog ang boarding house nga dunay 14 ka kwarto sa Purok Malipayon, Barangay Labangal, GenSan.
Alas-12 pasado sa udto, Biyernes Pebrero 16 dihang nahitabo ang sunog nga miresulta sa pagkaabo sa kabtangan sa mga boarders.
Silang Jeam Michael Española, bugtong mga sanina lang ang nasalbar dungan sa paspas nga pagkaon sa kalayo sa light materials nga gambalay.
Butyag ni Ellen Desabille, taga Barangay Disaster Risk Reduction Management Council sa unang impormasyon nga naabot kanila.
Dunay boarders nga naglung-ag gamit ang rice cooker, mikalit og brownout ug dihang pagbalik sa kuryente didto na nagsugod ang sunog.
Sa bahin ni Senior Fire Officer (SFO2) Angelo Suralta, chief investigator sa Bureau of Fire Protection (BFP) giimbestigahan pa nila ang tinubdan sa sunog.
Samtang, butyag ni Kapitan Bobby Pacquiao giandam na nila ang pinansyal nga tabang alang sa mga nasunogan. I Richel Gubalani