LEGAZPI CITY – Nasa duwang kaso na nin pagkagadan huli sa rabies an nairerehistro sa probinsya kan Albay ngunyan na bulan nin Enero.
Ini an kinumpirmar ni Dra. Estela Zenit, namamayo kan Provincial Health Office (PHO) sa Brigada News FM Legazpi.
Segun saiya, an enot, iyo an kaso sa Brgy. Panganiran, Pio Duran kun sain 7 anyos na menor de edad an biktima.
Susog sa detalye kaini, dai man ini nai-report sa health authorities, kaya makalihis an haros sambulan puon kan pagkakakagat saiya, saka sana dinara sa ospital huli sa mga sintomas kan rabies na nahiling.
An pangaduwa iyo an sa Purok 6, San Vicente, Jovellar kun sain 80 anyos an biktima.
Sinabi ni Zenit, may iba pa ining helang siring kan hypertension asin urinal infection na iyo an rason kun nata idinalagan sa ospital.
Alagad mantang nasa ward, nahilingan ini ki mga sintomas nin rabies siring kan takot sa tubig asin paros.
Kaya inimbestigaran ini kan doctor asin napag-araman na nakagat ini ki ayam kan Disyembre.
Tulos man na nag-imbestigar an PHO asin nag-contact trace bilang pagresponde sa insidente.