LEGAZPI CITY – Boluntad na suminuko sa mga otoridad an duwang dating miyembro kan New People’s Army (NPA) sa probinsya kan Albay sa paagi kan operasyong ikinondusir kan Philippine National Police – Police Regional Office 5 (PNP-PRO5) kaibahan an Philippine Army.
Binisto an mga ini na sinda alyas “Dona”, dating KADAMAY Coordinator asin nagserbi bilang dating Gabriela Provincial Chairwoman/Coordinator sa irarom kan Provincial White Area Committee (PWAC) asin myembro kan Bicol Regional Party Committee (BRPC); asin si alyas “Jun” na dating KADAMAY Regional Chairman, Regional White Area Committee (RWAC) asin BRPC member.
Naging dakulang katabangan an pinagsarong esfuerso kan Albay 2nd PMFC Bascaran Detachment, Daraga MPS, 93rd CMOC asin iba pang unit.
Mientrastanto, sa probinsya kan Camarines Norte, suminuko man an dating miyembro nin NPA na si alyas “Badeth”, kun sain kaibahan sa sinurrender kaini an saiyang .38 revolver asin sarong rifle grenade.
Makalihis an pagsuko kan mga ini, isinairarom sinda sa mga debriefing procedures asin matatawan nin assistance package kan gobyerno o an Enhanced Comprehensive Local Integration Program (E-CLIP).