NAGLAOM ang duha ka edaran nga napreso sa Polomolok Municipal Police Station tungod sa kasong pagpanglugos nga sila makagawas gumikan dili matud pa tinuod ang alegasyon batok kanila ug igo lang sila gipasanginlan sa ilahang mga silingan.
Sumala ni Tornino Labuan, siya mismo ang mikuyog sa kapulisan kaniadtong Disyembre 7 dihang miadto kini sa ilahang lugar tungod sa kaso niini nga pagpanglugos. Butyag niini nga gireklamo siya sa paryente sa iyahang asawa sa pagpanglugos og bata.
Samtang si Juanito Raga, sweeper sa plaza sa Polomolok nabalhog sab sa susamang kaso human sumala pa siya gireklamo sa silingan niini sa gipuy-ang boardinghouse sa Purok Balabat, Poblacion Polomolok sa pagpanglugos gihapon og bata.
Wala matud pa niya kini nahimo tungod matag adlaw siya nagatrabaho ug 66-anyos na sab ang pangidaron. Nanawagan ang mga nasampit ngadto sa mga reklamante nga sila pasayluon bisan wala matud pa silay sala, aron makalingkawas sa pagkabilanggo. I Enamie Mogpon