Pilason ang duha ka driver sang motorsiklo matapos ang nagluntad nga aksidente sa Brgy. Poblacion Sur, Sigma, Capiz takna alas 2:11 kaina sang kaaganhon, Oktubre 17.
Ginkilala ang biktima kay alyas “John”, 33-anyos, isa ka katapo sang Philippine National Police, na-aasign sa Camp Delgado, Iloilo City kag residente sang Tanghalan, Aklan.
Samtang ang suspek amo si alyas “Ken”, 22-anyos, estudyante kag residente sang Brgy. Dayhagon sa banwa sang Sigma.
Sandig sa imbestigasyon sang Sigma Municipal Police Station, nagikan sa probinsya sang Aklan ang biktima sakay sa iya Kawasaki Rouser nga motorsiklo kag magapadulong na kuntani sa Iloilo, apang pag-abot sa lugar nga ginluntaran sang aksidente, hinali nalang nag-U turn ang suspek nga nagamaneho naman sang Honda beat nga motorsiklo rason sang ila pagbunggu-anay kag pagkatumba.
Bangud sa natabo, lunsay nag-angkon sang kapilasan sa magkatuhay nga parte sang ila kalawasan ang biktima kag suspek.
Madasig naman nga nagresponde sa lugar ang Sigma Response Team kag ginpadangat sa Mambusao District Hospital ang biktima para sa nagakaigo nga pagbulong.
Gindapatan naman sang pauna nga pagbulong ang suspek kag ini ang nagpamalibad nga magpadala sa ospital.
Sa karon, yara sa kustodiya sang Sigma PNP ang mga motorsiklo nga naulamid sa aksidente samtang nag-areglohanay naman ang biktima kag suspek. | Judy Ann Juare