Dakop sa akto ang duha ka tripulante nga nagapatigayon sang iligal nga pagpangisda sa kalalawran nga sakop sang Panay pasado alas 3:00 kaina sang kaaganhon, Disyembre 13.
Ginkilala ang mga nagkaladakpan nga sanday alyas Arnold kag alyas Nelson.
Nakuha sa paghinakop ni alyas Arnold ang 1 unit pump boat; 2 unit 20hp Diesel engine; fishing net with complete accessories; mas o menus 10 kilos sang nagkalain-lain nga sahi sang isda kag ginabanta may kabug-usan nga P343,000.
Samtang kay alyas Nelson, nakuha sa iya ang 1 unit pump boat; 1 unit 4dr5 Diesel engine; fishing net with complete accessories; mas o menus 15 kilos sang nagkalain-lain nga sahi sang isda kag ginabanta nagabalor tanan sang P254,500 ang mga nakumpiskar.
Magapangatubang ang mga ini sang penalidad nga paglapas sa Municipal Ordinance No. 03-02 (Municipal Fishery Code), Series of 2003.
Sa karon, nagapabilin ang mga nagkaladakpan sa kustodiya sang MENRO-LGU Panay para sa nagakaigo nga disposisyon. | Judy Ann Juare