Pilason ang 39-anyos nga driver matapos nabungguan sang kasugata nga motorsiklo nga ginamaneho naman sang isa ka menor de edad takna 8:45 sang gab-i sa Barangay Maindang, Cuartero Capiz.
Ginkilala ang driver/victim kay Cristina Salazar, kasado kag residente sang Brgy. Agdahon samtang ang driver/suspek amo si alyas ‘John’, 16-anyos, estudyante lunsay residente sa nasambit nga banwa.
Base sa impormasyon nagikan sa Cuartero PNP, ginapahayag nga samtang ginasubay ni Salazar ang dalan nagikan sa Maindang proper padulong sa Agdahon, hinali nalang ini nga ginbungu-an sang kasugata nga motorsiklo nga ginamaneho ni alyas ‘John’ sakay sang iya sini backrider nga isa man ka menor de edad.
Bangud sa impact, nagtumba ang mga ini sa dalan kag nag-angkon sang pilas sa nagkatuhay nga parte sang lawas.
Gilayon nga gindapangat sa Mambusao District hospital sang Cuartero Emergency Response Unit (CERU) si alyas ‘John’ kag ang backrider sini apang sang ulihi ginsaylo sa Roxas Memorial Provincial Hospital para dapatan sang nagakaigo nga atensyon medikal.
Samtang, gindala naman sa Dao District Hospital si Salazar para dapatan man sang pagbulong.
Sa karon, nagapabilin sa kostudiya sang Cuartero MPS ang 2 ka motorsiklo nga imbolbado sa nagluntad nga aksidente.// KMD Gicalde