Patay ang duha ka persona matapos ginpangbuno sa Brgy. Janguslob, Dumarao, Capiz pasado alas 9:00 kagab-i sang Dominggo, Oktubre 9.
Ginkilala ang mga napatay nga sanday alyas “Joe”, 48-anyos kag alyas “Jay”, 29-anyos, mga mamumugon samtang ang suspek amo si alyas “Tagoy”, 25-anyos lunsay mga residente sang nasambit nga lugar.
Sa interview sang Brigada News FM Roxas City kay PMaj. Cristopher Candelario, OIC sang Dumarao Municipal Police Station, iya ginpahayag nga naga-inom inom sang makahulubog nga ilimnon ang duha ka biktima sa kilid sang naga-ihaw ihaw ukon inasalan sa amo nga lugar sang hinali nalang nag-abot ang suspek kun sa diin gintawag ini sang mga biktima nga “Kas” apang ini ang ginkaakig sang suspek bangud indi siya luyag nga tawgon nga “Kas” kundi “Tol” lang dapat.
Suno pa kay Candelario, nagabot sang kutsilyo ang suspek pero ini ang nahulog, madasig niya ini ginpulot kag gindusak kay alyas “Jay” magatambag lang kuntani si alyas “Joe” pero ini ang nabun-an man.
Nag-angkon sang patal nga pilas sa dughan ang mga biktima kag ginpadangat pa sa Dao District Hospital apang gindeklara ni Dr. Mallie Griño nga dead on arrival sa ospital sanday alyas “Joe” kag alyas “Jay”.
Sa karon, nakahunog na sa karsel sang Dumarao PNP ang suspek matapos nadakpan sang mga kapulisan sa ginhiwat nga hot pursuit operation.
Desidido naman nga magpasaka sang kaso ang pamilya sang mga biktima batuk sa suspek. | Judy Ann Juare