Ginkasuhan eon it Frustrated homicide ro daywa ka suspek nga nagpangbuno sa may Brgy. Linabuan Sur, Banga, Aklan ku Huebes Santo, Marso 28.
Ginkilaea ro biktimang si Acil Nadate 25yo, sangka delivery driver it bakery ag taga Brgy. New Buswang, Kalibo nga nag angkon it nina sa may kili-kili ag uyahon.
Ro mga suspek hay ginkilaea nga sanday Jose Pioquid 60yo, taga Brgy. Jugas, New Washington ag Joey Bacanto 41yo nga taga Brgy. Linabuan Sur, Banga.
Sa imbestigasyun, matapos segun nga mag ihapon ro biktima sa sueod it ginatrabahuhan kara nga bakery hay nagdesisyon imaw nga magbaylo it eambong sa andang barracks.
Pero kat pagabuksan eon kunta it biktima ro gate it bakery hay nakita kara ro daywa ka suspek nga parehung nakainom ag may daea nga kutsilyo ag ginhambaean imaw it sambilog sa mga suspek nga kung maisog raya hay gumuwa it gate.
Gintikeod pa segun it mga suspek ro gate pero dumaeagan sa sueod ro biktima ag ginbuoe kara ro pala ag binalikan sa guwa ro mga suspek ag ginhambaean it biktima kung ano ro saea kara kanda.
Dikara ag gin-atake it mga suspek ro biktima ag gintueop ag ginbuno pa it mga raya. // ANN DESLENE SALAZAR