Boluntaryo nga gin-surrender sang duha ka persona ang 2 units sang armas-luthang sa Panay Municipal Police Station.
Sandig sa Panay MPS, takna alas 12:20 kahapon sang Dominggo, Marso 10, gin-surrender ni alyas “Ellin,” 43-anyos sang Brgy. Bagacay ang 1 unit Norinco caliber .45 Pistol, nga may serial number kag isa ka magazine nga wala sang bala nga ginapanag-iyahan sang iya mister nga si alyas “Norman” samtang ginaproseso pa ang renewal sang lisensya sini.
Samtang, takna 1:00 sa kapareho man nga adlaw, gin-surrender naman ni Punong Barangay Tomas Borreros sang Brgy. Cabugao Este sa nasambit nga banwa ang isa ka unit sang Smith and Wesson (US) caliber .22 revolver nga wala sang bala nga ginapanag-iyahan naman sang isa niya ka pumuluyo.
Ini ang resulta sang ginpasangkad nga kampanya sang kapulisan nga Tokhang Kontra Armas Luthang ukon (TKAL).
Sa karon, yara na sa paghinakop sang FESAGS division ang nasambitan nga mga armas para sa nagakaigo nga disposisyon. | Judy Ann Juare