KALIBO, AKLAN—Umabot sa 20 nga empleyado it Department of Public Works and Highways (DPWH) Aklan do tinamaan it coronavirus disease 2019 (COVID-19).
Nauna eon nga nagpositibo sa virus do sangka empleyado maghalin sa Planning and Design Section ag ginpaidaeom sa swab test do mga high risk contact kara ag gumuwa nga positibo man sa COVID-19.
Bangud sa nagainabong numero it nagpositibo sa nasambit nga taeatapan, nagsueat si Dr. Jocelyn Garcia, Municipal Health Officer it Kalibo kay District Engineer Alejandro Ventilacion nga temporaryong ipasara do andang opisina hasta ginahueat pa do kadugangan nga assessment ag recommendation it MHO ag ginlaygayan nga magpatigayon it maid-id nga disinfection.
Nasayuran nga mag-eowas sa nagpositibo sa Planning and Design Section hay natapnan man do iba pang empleyado nga una sa Maintenance ag Construction Section. // SHERRY ANNE REUNIR-VIDAL