BAYNTE ka panimalay ang na demolish, duha ang naugdaw, usa ka tagbalay ang nasamdan alas kwatro sa kaadlawon adlaw nga Dominggo, Mayo 2, 2021 sa Kawas, Alabel, Sarangani Province.
Sa kumpermasyon ni Vilma Talino, usa ka lomolupyo sa lugar nakuratan nalang sila nga adunay niabot nga daghang tawo unya may kauban nga mga gwardiya gi-demolish ang ilang kabalayan, wala silay nahimo sa kahadlok mao nga nagtan-aw nalang nga ginaguba ang ilang pinuy-anan.
Subay sa mga hulagway gikan kanila, duha ka balay ang nasunog unya ang nasamad sa kamot kay nabunalan mao si Linda Cabca apan luwas kini sa kuyaw nga kahimtang apan wala na sila nakabalik sa area kay aduna nay bantay.
Gidugang ni Talino nga kapin ug kulang usa ka gatus ka mga tawo ang nisulod sa ilang dapit unya walay pahibalo kanila nga may demolition, sa iyang pagkasayod adunay naga-claim sa yuta nga ilaha usab nga gina- claim, usa ka nagpangalang Mr Hilado nga taga GenSan ang nagbutang og gwardiya unya nagkural sa 30 ektaryas nga luna apan wala matud pay court order nga gipakita.
Samtang sumala usab sa usa ka concerned citizen nga unang nagpaabot og impormasyon sa Brigada, siya ang niadto sa pulis ug sa opisina sa mga bombero sa Alabel aron ipahibalo ang nahitabo apan naugdaw na ang duha ka balay ug nawala na usab ang nag-demolish sa mga balay.
Human sa demolisyon sa kalubihan nalang ang mga na apektuhan didto nagluto ug namahaw samtang ang ilang leader ang nangayo usab ug tabang sa barangay ug munisipyo kay wala daw silay kapuy-an o kalbalhinan kuyog sa ilang mga kabataan. (Ever Diazon)