LEGAZPI CITY – Uminabot sa 20 mga kaso nin Violence Against Women and their Children (VAWC) an nairehistro sa banwaan kan Camalig sa enot na tulong bulan kan taon 2024.
Basado ini sa datos na iprinesentar kan Camalig Municipal Social Welfare and Development Office (MSWDO) sa saindang pag-orolay kaibahan si alkalde Caloy Baldo, miyembros kan Local Council for the Protection of Children (LCPC) asin Local Committee on Anti-Trafficking & Violence Against Women and their Children (LCAT-VAWC).
Nagluluwas sa datos na 7 kaso an nairehistro sa irarom kan Republic Act No. 9262 o Anti-Violence Against Women and Their Children Act of 2004, 13 kaso man an nairehistro sa irarom kan Republic Act No. 7610 o Child Abuse, mantang zero cases sa irarom kan Republic Act No. 9344 o Juvenile Justice and Welfare Act of 2006.
Mientrastanto, nanutaran man an pagbaba kan numero nin mga child laborers sa banwaan, kun sain basado sa datos kan Public Employment & Service Office (PESO), igwa na sana ki 167 hale sa 317 durante naman sa pigsagibong nindang mga lakdang.