200 balay sa Davao City naabo gumikan sa away mag-asawa

Gilamoy sa kalayo ang dili moubos sa 200 ka panimalay sa Block 8 ug 9 Muslim Village, Vista Mar, Purok 11, Barangay Ilang, Davao City alas 9:42 sa gabie Abril 28, 2021.

Sumala pa ni Kapitan Amado Babao sa interview sa Brigada News Davao, balay sa mag-asawa nga una nang nag-away ang gisugdan sa sunog nga paspas mikatay sa kapin 200 ka balay.

Pipila sa mga silingan sa mag-asawa ang mibutyag sa interview sa Brigada nga gituyo matud pa pagsunog human sa away sa wala pa gikabutyag nga mag-asawa diin ginaimbestigahan pa sa otoridad aron kini makomperma.

Sa kapin 200 na ka balay nga nasunog apektado ang anaa sa 240 ka mga pamilya.

Gideklarang fire out na ang sunog 11:08 sa gabii pinaagi sa Panacan Bureau of Fire Protection.

Sa karon, nanawagan ang mga residenteng nasunogan og pagkaon ingon usab sanina nga ilang magamit sa kasamtangan ingon man halos kadaghanan kanila ang walay nasalbar nga gamit.

Leave a Reply

Your email address will not be published. Required fields are marked *