LEGAZPI CITY – Ikinondusir kan lokal na gobyerno kan Daraga, Albay an paglinig sa Sagumayon River sa banwaan.
Sa tabang ini kan pinagsarong esfuerso kan mga personahes nin Municipal Environment and Natural Resources Office (MENRO) asin Municipal Engineering Office (MEO), kun sain nagkondusir sinda nin declogging operation digdi nin huli sa mga natipong manlaen-laeng klase nin basura.
Mientras, uminabot sa 200 na sako ki mga basura an nakolektar sa paagi kan operasyon asin ipapaagi sa final sorting pag-abot sa Municipal Central Materials Recovery Facility (MCMRF).
Nagpagirumdom an lokal na gobyerno sa mga konstituwentes kaini manungod sa tamang pag-segregate nin basura, pagtapok sa tamang basurahan asin an pirming pagmantenir kan kalinigan nin kapalibutan na para man sana sa ikakamaray kan kagabsan.