MOABOT sa P1.4 Million“Z-Benefit”medical services package ang ihatag sa Philippine Health Insurance Corporation XI alang sa 27 ka pasyente nga dunay breast cancer sa Davao Region karong 2024.
Sigon kang Dr. Giannelli Kristine Remocaldo, PhilHealth XI medical evaluator, tungod nagkataas ang ihap sa mga natalang kaso sa breast cancer giusbawan ang bugdet gikan sa P100,000 ngadto sa P1.4-M.
Mamahimo lamang maka-avail ang mga myembro sa Z-Benefit package depende sa panginahanglanon sa pasyente diin mahisakop niini ang surgeries, breast ultrasound, mammogram, chemo, ug radiation therapy.
Dugang ni Remocaldo, anaa sa 21 ka ospital ang gikontrata sa ahensya alang sa gitanyag nga Z-Benefit packages kung asa sa Davao Region adunay duha, kini mao ang SPMC sa Davao City, ug DRMC sa Tagum City.
Kahibaluang ang breast cancer mao ang pinakakomon nga matang sa cancer nga sagad motakboy sa mga kababaenhan sa Pilipinas ug ikatulo sa pinaka-makamatay nga kanser sa nasud.
Subay usab sa National Cancer Institute, ang breast cancer ang pinaka-komon nga kanser sa tibook kalibutan ug ikaduha sa tuig 2023.
Base usab sa report sa Philippine News Agency, 65% sa breast cancer cases sa Pilipinas na-diagnose nga anaa na sa advanced o late stages tungod sa kakuwang sa pagtratar ug early detection.