Tulo ang patay sa engkwentro atol sa gilusad nga anti illegal drug operation sa mga operatiba sa Police Drug Enforcement Group (PDEG) Visayas (Special Operations Unit-7), Criminal Investigation and Detection Group (CIDG), Cebu City Police Office (CCPO), City Intelligence Unit (CIU), Highway Patrol Group (HPG-7) ug Philippine Drug Enforcement Agency (PDEA-7.
Ang buy bust operation nahitabo sa Barangay Taptap, bukirang barangay sa Siyudad sa Sugbo pasado alas onse kagabie.
Gibana-bana nga moabot sa 10 ka kilo sa gituohang shabu nga mobalor P68 Million ang nasakmit sa maong operasyon.
Ang tulo ka mga namatay sakay sa usa ka vios nga sakyanan.
Matud ni Pol. Brigadier Gen. Remus Medina, Director sa PDEG Visayas nga sa wala pa ang maong pagkamatay sa tulo, adunay gipahigayon nga buybust ooeration ang operatiba didto sa Campo 4 sa Talisay City diin didto unang nahitabo ang encounter.
Nakigtambayayong matud pa sila sa CIDG7, CCPO ug Highway Patrol group aron ma trace ang identity sa sakyanan nga ilang nasayran nga giingung gikargahan sa mga drugas ug didto sa barangay Taptap giingung gipahunong sa mga otoridad ang maong sakyanan nga giluwanan sa tulo apan giingung misukol na hinuon kini sa mga otoridad.
Hinuon walay gikatahong naangol sa habig sa kapolisan sa maong engkwentro.
Usa ka bulan matud pa nga gipanid-an ang kalihukan sa maong drug group nga naglihok sa Sugbo ug mga silingang dakbayan.
Sa pagkutlo niining balita wala pa makapagawas og pangalan ang operatiba sa tulo ka mga nangamatay apan matud ni Medina nga aduna na silay idea sa background sa maong mga durugista.
Gawas sa mga drugas nga nasakmit aduna usab mga armas nga nakuha ang kapolisan sulod sa sakyanan nga gisakyan sa mga nangamatay.