Tulo ang patay isa kritikal ug usa samdan sa nahitabong kagubot sa Purok 4, Brgy. Lacson, Calinan, ning dakbayan sa Davao alas- 4:00 kaganihang hapon, Hulyo 26, 2023.
Ang duha ka pulis nga namatay nailang sila PCpl Mark Anthony Corsino ug Police Senior Master Sergeant (PSMS) Tito Lague samtang kritikal ang driver sa Mobile.
Napatay sab ang usa sa duha ka suspek nga nailang si Benao Maanib Landas, 29 anyos, minyo, tribal leader nga taga- Kalayaan, Sitio Pangyan, Barangay Tamugan, Marilog Dist., Davao City samtang nadakpan ang kauban niini nga si Rico Masacay, 25 anyos, ulitawo, contruction worker, ug residente sa Sitio Malikongkong, Brgy. Gumitan, Marilog Dist., Davao City.
Una niini, girespondihan sa kapulisan sa Calinan ang taho nga dunay nahitabong komosyon sa nasangpit nga lugar.
Apan pag-abot sa kapulisan sa area, kalit na lamang sila nga gipangtigbas sa mga suspek nga hinungdan sa kamatayon ni PCpl Corsina ug PSMS Lague.
Nailog pa sa mga suspek ang M16 sa mga pulis ug gipaarakan ang mga otoridad.
Padyaon karon ang gihimong imbestigasyon sa Calinan Police sa nahitabo.