LEGAZPI CITY – Arestado an 30 anyos na lalaki na kairibahan sa listahan kan drug personalities sa ikinondusir na operasyon kontra iligal na droga sa Brgy. Poblacion, banwaan kan Malilipot, Albay.
Sinagibo an operasyon kan mga personahe kan Malilipot Municipal Police Station na ikinaarestar kan suspek na residente man sana kan kaparehong lugar.
Nakumpiskar sa posesyon asin kontrol kan suspek an sarong pidasong sachet nin pinagtutubudang “shabu”, duwang pidasong sachet nin kaparehong item, sarong pidaso nin 500 pesos bill na buy-bust money asin nagkapirang barya.
Nasa kustodiya na ini kan nasambit na hepatura para sa magkakanigong disposisyon.