BNFM BICOL—Dead on arrival ang isang motorista matapos na sumalpok ang minamaneho nitong tricycle sa isa pang tricycle sa Brgy. San Roque, bayan ng Virac, Catanduanes.
Batay sa ulat ng mga otoridad, kinilala ang biktimang si Mark F.Fernandez, 30-anyos, residente ng Brgy. Burgos bayan ng Viga.
Kwento ng mga nakasaksi sa insidente, galing umano sa Brgy. Danicop ang biktima at patungo sana sa Virac Town Center nang aksidente itong sumalpok sa isang nakaparadang tricycle sa harap ng DepEd Division Office.
Dahil sa lakas ng ‘impact’, sumemplang ang dala nitong behikulo at nadaganan pa ang biktima.
Nagtamo ng pinsala sa ulo ang rider, at naisugod pa naman sana ito sa Eastern Bicol Medical Center upang lapatan ng lunas, ngunit idineklarang Dead on Arrival, ng sumuring doktor.
Samantala, nasa kustodiya ng Virac PNP ang mga sangkot na behikulo para sa karampatang disposisyon habang ipinaalala naman nito sa mga motorista na maging maingat sa pagmamaneho para maiwasan ang mga katulad na insidente.###