Nakapag aresto ro Police Regional Office (PRO-6) it kabilugan nga 305 wanted person sa sueod eamang it sang adlaw sa dungan nga operasyon kontra sa mga may warrant of arrest.
Kabilugan nga 1,216 nga warrant of arrest ro ginkasa it sari-saring unit it pulisya sa Western Visayas nga nagresulta sa pagkaaresto it 305 nga indibidwal.
Sa nasambit nga numero, 24 ro kaeakip sa Most Wanted Persons (MWP) ag 281 man ro Other Wanted Persons (OWP).
Sa pag-aresto sa mga MWP, ro probinsya it Iloilo ro may pinakamaabung numero it mga naaresto nga may 9; sinundan it Negros Occidental nga may 8; Iloilo City, Antique ag Guimaras nga may daywa ag sambilog sa Bacolod City.
Samtang, sa pag-aresto sa mga OWPs nanguna ro Negros Occidental Police Provincial Office (PPO) nga may 157; sinundan it Iloilo PPO nga may 71; Bacolod City PO- 12; Antique PPO ag Aklan PPO nga may tig-11; Iloilo City PO- 8; Capiz PPO – 7 ag 4 man sa Guimaras PPO.
Gindayaw man ni Police Brigadier General Leo M Francisco, Regional Director it PRO 6, ro tanan nga mga unit it pulisya sa rehiyon para sa pagtinguha kontra sa mga naaresto. / ANN DESLENE SALAZAR