GIBUTYAG sa pagtuon sa University of Mindanao-Institute of Popular Opinion (UM-IPO) nga 33 sa 100 ka mga lalaki/bana ang nakatagamtam og pagpangabuso sa kamot sa ilang mga asawa o partners.
Base sa report nga nakaangkla sa pagtuon nga gihimo sa College of Criminal Justice Education, pipila sa natumbok nga nag-unang rason sa spousal abuse o pag-abuso sa mga asawa sa ilang mga bana mao ang pagkadismaya o stress, dunay dominanteng kinaiya ug kanunay mangitag atensyon ang asawa.
Namatikdan usab sa UM College of Criminal Justice Education ang pagsaka sa trend sa domestic violence diin ang mga babaye maoy sad-an samtang kadaghanan sa mga biktimang bana ang nagpakahilom ug wala nisumbong sa otoridad o anaa sa usa matag tulo(1:3) ka bana ang nakasinati niini.
Pinakakomon nga matang sa pag-abuso mao ang emosyunal dayon gisundan sa financial abuse, physical abuse, psychological abuse, ug technological abuse kung diin ang pagpanakit pinaagi sa pulong ug pisikal, pagpakaulaw sa social media, pagpangayo og kwarta, ug pagbiaybiay opag-insulto sa ilang mga bana sa higayon nga masuko mao ang sagad mahitabo.
Sigon ni Institute of Popular Opinion Specialist Dr. Joel Tan, gipahigayon ang pagtuon niadtong tuig 2021 (pandemic time) kung asa 1,703 online paticipants ang nahimong respondents niini nga pulos mga bana (husbands).
Alang usab kang Dr. Nestor Nabe, College of Criminal Justice Education assistant dean, kinahanglan duna patas nga pagtan-aw sa katungod alang sa mga ana hinungdan nagkinahanglan og hinanali nga interbensyon ang maong hisgutanan aron matubag ang domestic violence sa mga bana nga sagad dili mareport sa otoridad.
Kahinumdumang dunay gihikay nga lakang si Cong. Migz Nograles aron amyendahan ang VAWC (Violence against Women and their Children) law diin tinguha nga ilakip ang mga bana isip biktima sa domestic violence.