MISAKA na sa 3,349 ka frontline personnels sa Police Regional Office (PRO) 12 ang maipailawom sa regular swab tests. Matud ni PLt. Col. Tetchie Lebanan, Acting chief sa Regional Health Service,12 tumong ang protektahan ang mga personahe ug pamilya batok sa nagpadayong bahad sa Covid-19.
Tungod nagkadaghan na usab ang kaso sa Covid-19 infections gihimo nilang prayoridad ang pagpailawom sa mga sakop sa reverse transcription polymerase chain reaction (RT-PCR) tests. Sa datus, naa na sa 467 ka pulis ang natakboyan sa virus asa labing bag-ong ang 13 ka sakop sa Sarangani Police Provincial Office (SPPO).
Dunay gimuntar nga mga testing centers ang PRO-12 sa pipila ka mga police officer sa rehiyon ug duna usab mga isolation facilities. Dugang ni Lebanan, ang regular nga swab test sa mga personahe ang aron mapadayon ang operasyon sa PNP.
Samtang naa na sa 436 ka pulis sa PRO-12 ang nabakunahan na gikan sa priority group A1 hangtud A3 nga mao ang frontline medical health care workers, senior citizens ug adult with comorbidities.
Gihingusgan sa opisyal nga kinahanglan ang regular swab test aron maka-sustiner ang kapulisan sa operasyon. Makonsider ang mga pulis nga ‘prone’ sa impeksyon tungod sila ang tigpatuman sa minimum health protocols samtang naghimo sa regular nga trabaho aron masiguro ang kahapsay ug kalinaw. ( Richel Gubalani)