BICOL— Dae naging angat ang nagpapadagos na krisis dara kan COVID-19 pandemic para dae ipadagos asin i-selebrar ang taunang Abaca Festival sa islang probinsya nin Catanduanes.
Aldaw nin Lunes suogma petsa 24 kan pormal na pinunan ang limang aldaw na selebrasyon kan Abaca Festival na madurar hasta petsa 28, aldaw nin Biyernes. Alagad huli sa mga ipigpapautob na mga health protocols huli kan humang dara nin pandemya, virtual o online ang paagi nin pag selebrar ngunyan kan festival na may temang “Kusog kan Hibla ng Abaca: Burunyog sa Paglaban sa Pandemya”.
Suogma, isinagibo ang ang virtual opening ceremonies, E-Barakalan, Trade and Tourism Fair, Festival Queen Costumes Exhibit, asin Presentation of Abaca Arch and Facade Entries.
Ngunyan na aldaw, isasagibo ang Rawit sa Abaca Spoken Word Poetry Contest, AbaCaptures (Photography Contest), asin AbaCatandungan sa Radyo. Saaga, aldaw nin Miyerkules, iyo ang pagkundusir ning Abaca Festival Virtual Concert, Abaka Tiktok Dance Fest, asin Abaca-da: Usaping Pagpapaunlad ng Industriyang Abaca sa Isla asin sa petsa 28 ang Festival Queen Virtual Showdown asin ang Virtual Closing and Awarding Ceremonies.
Isineselebrar ang nasabing festival kada ika-apat na semana nin Mayo susog sa Provincial Ordinance No. 21-2015. Obheto kaining mapaangat ang kamalayan kan lambang Catandunganon sa importansiya asin kontribusyon nin industriya nin pag-a abaca. Ang Catanduanes ang Abaca Capital kan nasyon huli ta ini ang top producer nin abaca sa bilog na Pilipinas. -30-