Wala na natabang ang tulo ka mga estudyante ug patay na kining nahaon gikan sa sapa human nga nalumos pasado alas-2:00 sa hapon sa Liloan Riverside, Purok Sunflower, Mandug, Davao City.
Sa imbestigasyon sa Mandug Police Station, gikanayon sa witness nga nailang si MARCO ANDRO A REGINIO JR., 12, estudyante, ug residente sa Cabantian, ning syudad, nga nagkasabot sila sa iyang classmate nga dili musulod sa ilang klase ug mangaligo sa sapa sa Brgy. Mandug.
Pag-abot nila lugar, naligo dayon ang iyang mga amigo, apan nakadesisyon siya nga mutan-aw lamang.
Sa dihang kalit na lamang nga nikusog ang bul-og sa tubig, nakalingkawas pa si ERJOHN B GABIOLA, 12, nga taga- Brgy. Tigatto, apan ang tulo niya ka mga classmate ang kalit na lamang nga nawala nga mao sila TAKIE SANICO, 13, taga Buhangin; JERICK M REDULLA, 12, nga taga- Hillside Tigatto, ug KIAN BITUIN, 12, nga taga- DIHO Cabantian, nga puros sila nagtungha sa Buhangin Central Elementary School Sped Center.
Paspas sila nga nakapangayo og tabang nga gilayong girespondihan sa Brgy. Mandug rescuer, 911 Search and Rescue Team ug 911 Ambulance, gisulayan pa sa pag-CPR ang tulo ka mga bata sa dihang nakuha kini gikan sa sapa, apan gideklarang wala nay kinabuhi sa medic team leader.
Gidala ang mga biktima sa M. Deang Funeral Services, Sto. Ñino Mandug, ug gikatakda nga kuhaon sa mga pamilya ug dal-on sa ilang panimalay alang sa haya.