LEGAZPI CITY – Gadan an sisenta y nwebe anyos na motorista sa sarong aksidente kasuudma sa Magsaysay Avenue, Corner Torres Street, Brgy. 7, Bacacay, Albay kun sain tulong lunadan an imbwelto.
Binisto an nagadan na si Jose Balea Batalla, driver kan motorsiklo asin residente kan Purok 2, Brgy. San Andres, banwaan kan Sto. Domingo sa kaparehong probinsya.
Sa imbestigasyon kan pulisya, nagluluwas na sarong pulang TMX na tricycle na pigmamanehar ni Richard Borral Baliza asin kaibahan an sarong pasaherong si Aba Palibino an pasiring sa Brgy. 1 kan Bacacay hale sa Magsaysay Avenue mantang saro man na truck na minamanehar ni Randy Bautista an nagbaybay sa suhay na direksyon.
An motorsiklo, hale sa Torre Street pasisiring man sa Magsaysay Avenue. Alagad, pag-abot duman, nabunggo kan tricycle an motorsiklo hale sa likudan, rason nganing maulog an motorista saka naligis kan truck asin napairarom digdi.
Tulos na dinalagan sa ospital an mga biktima alagad idineklarar na dead on arrival kan attending physician an motorista.
Mantang, nagsapar man ki manlain-laing lugad an iba pang imbwelto sa aksidente. Tulos man na nagresponder an personahes kan mga otoridad sa insidente.