Patay ang usa ka lola human kini gibanggaan sa usa ka motorsiklo gahapong adlawa, ala 1: 05 ang takna sa hapon, Mayo 28, 2021 sa Brgy. Poblacion, Matanao, Davao del Sur.
Subay sa imbestigasyon sa kapulisan, ang biktima giila nga usa ka Eriberta Tabar Famor, kinsa giingon nga mitabok sa kalsada ug gibanggaan sa usa ka motorsiklo nga gimaneho sa usa ka Elizard Emperado delos Santos, 29 anyos, walay lisensya nga nagmaneho sa usa ka walay rehistro nga motorsiklo. Sa kakusog sa dagan sa maong motorsiklo wala niini nabantayan ang pagtabok sa nasampit nga biktima.
Ang biktima nakahiagom og samad sa iyahang ulo ug dali-dali kini nga gidala sa balay tambalanan, apan sa paglabay sa pipila ka oras wala na kini makasugakod.
Nagtingkagol na karun sulod sa prisohan ang suspetsado, ug naka andam na nga pagapasakaan ug pormal nga reklamo sa pamilya sa biktima.
