LEGAZPI CITY – Kinumpirmar kan Department of Health (DOH) Bicol na siyam an naerehistrong kaso nin rabies death sa Bicol Region sa enot na duwang bulan kan 2024.
Segun kay Ruby Dizon-Jeremias, Regional Rabies Program Coordinator kan nasambit na ahensya, nangenot digdi an Albay na may apat na kaso, sunod an Camarines Norte asin Camarines Sur na may tigduwa, saro an nairehistro sa Sorsogon, mantang wara ki nairehistro sa mga probinsya nin Catanduanes asin Masbate.
Naglangkaw su boot ini sa 60% kun ikukumpara sa parehong peryodo kan nakalihis na taon na nakapagrehistro sana nin limang kaso.
Paliwanag kaini, an mga nagadan sa nasambit na helang iyo an mga dae tulos nagpabakuna makalihis ining makagat huli ta hararayo an saindang lugar o barangay asin wara sinda nin bastanteng kaaraman sa kun ano an dapat gibuhon pag nakakagat nin ayam o ikos.
Segun pa saiya, kadaklan sa mga hayop iyo an mga balagaw-bagaw na ayam o stray dogs sa tinampo asin mga menor de edad an nagin mga biktima.