LEGAZPI CITY – Posible su boot na maisasabay na sa guidelines kan Seal of Good Local Governance (SGLG) kan Department of Interior and Local Government (DILG) sa mga masunod na taon an pagkakaigwa nin accreditation sa mga negosyo na may kinaraman sa turismo.
Segun kay Department of Tourism (DOT) Bicol Regional Director Herbie Aguas, ini an rason kun nata ninda pig-iinganyar an mga lokal na gobyerno sa rehiyon na obligahon an mga business establishments na may kinaraman sa turismo na magpa-accredit.
Importante kaya su boot an accreditation sa kada negosyo orog na para sa safety kan mga turista asin nganing dae mapasupgan an saindang dudumanang mga lugar.
Segun pa kay Aguas, may mga standards sa pagkua nin accreditation sa DOT depende sa lebel kan sarong negosyo.
Sa oras na an gabos na negosyo sa turismo an rehistrado sa accreditation, mapaparekas an pagkua kan datos kan mga minaarabot na turista.