Nagapabilin sa kustodiya sang Roxas Component City Police Station ang isa ka lalaki matapos nadakpan nga nagpangawat sang aircon sa Mission Hills Subdivision, Brgy. Milibili, Roxas City.
Ginkilala ang biktima kay Peter John Martinez, estudyante, 22-anyos, residente sang nasambit nga lugar samtang ang ginatudlo suspek amo si Nasrudin Tasil, scrap collector, residente sang Tres Arcangeles, Brgy. Lawaan sining syudad.
Sandig sa impormasyon nagikan sa Roxas City PNP, takna alas 2:00 kahapon sang Martes, Enero 23, natatapan sang biktima nga wala na ang ila aircon nga nagabalor sang P15,000 nga ila ginbutang sa garahe.
Ginapahayag nga nadumduman sang biktima nga nag-agi ang suspek sa guwa sang ila balay sang amo man nga adlaw bangud ini ang nagapangolekta sang scrap kun sa diin namangkot ini kun ginabaligya ang amo nga aircon.
Bangud sini, may kutob na ang biktima nga ini ang nagkuha sang nasambit nga gamit.
Ginpadulungan sang biktima ang ginatrabahuan sang suspek kag didto sini nadakpan nga ginapangguba na sang suspek ang aircon.
Nagpanawag sa pulis ang biktima kag ginreport sini ang natabo.
Sa karon, ginahulat nalang sang kapulisan kun magapasaka sang kaso ang biktima batok sa suspek. | Judy Ann Juare