KALIBO, AKLAN—Kaibahan si Aklan Governor Florencio Miraflores sa 24 gobernador sa nasyon nga nagsuporta sa sangka sa resolution it Partido ng Demokratiko Pilipino-Lakas ng Bayan (PDP-Laban) nga naga-engganyo kay Pangoeong Rodrigo Duterte nga magpadaeagan bilang bise presidente sa May 9, 2022 National and Local elections.
Sandig sa andang collective statement, ginpahayag it mga gobernador nga do COVID-19 response it administrasyon hay nangin madinaeag-on ag do gusto nanda nga masunod nga magapungko nga presidente hay magiyahan ni Pangoeong Duterte eabi eon sa giyera kontra sa illegal nga droga ag sa ginapangatubang nga pandemiya.
Dugang pa kara, gusto man it mga gobernador nga maipadayon do naumpisahan it Pangoeo sa pagpatuman it mga infrastructure project bilog ng pungsod kamana it pagpaobra it bag-ong daean, tulay, eskwelahan, airports, seaports at iba pa.
Pagkinahangeanon man sigon do sinsero nga pagmalasakit ni Duterte sa milyong mga overseas Filipino workers nga padayon kara nga ginaprotektahan kontra sa mga nagapamintaha ag nagapang-abuso.
Samtang, mag-eowas kay Miraflores, kaibahan man sa mga gobernador sa Region 6 nga nagpaabot it suporta hay sanday Iloilo Governor Arthur Defensor Jr., ag Governor Esteban Contreras it probinsya ng Capiz. // SHERRY ANNE REUNIR-VIDAL