LEGAZPI CITY – Tinawan-duon ni Committee on Women, Children Chairman asin Albay 3rd District Board Member, Dra. Eva Josephine Ribaya an importansya kan pakikisumaro kan publiko para sa karapatan kan mga kababaihan sa probinsya kan Albay.
Sa pinakaenot na Provincial Violence Against Women Congress (VAWCon), sinabi ni Ribaya na an pagtatarabangan kan manlaen-laen na sektor, importante nganing matuldukan an naglalangkaw na kaso nin mga karatan asin pangungulog sa mga kababaihan sa probinsya.
Sinabi pa ni Ribaya na nauugma siyang mahiling an mga partisipante sa aktibidad huli ta patotoo ining pigbubusol an pagprotehir sa karapatan kan mga kababaihan asin mga kaakian.
Dugang pa kaini, sa nakalihis na duwang taon, maski papano, nahiling an pagbaba kan mga kaso kan violence agains women and children (VAWC) sa probinsya.
Segun man sa datos kan PNP, igwa nin labi 8,000 na mga kaso nin VAWC kan 2021, asin buminaba sa labi 7,000 kan nakalihis na taon.