LEGAZPI CITY – Kinumpirmar kan Commission on Elections (COMELEC) Bicol na an probinsya kan Albay an may pinakahalangkaw na porsyento ki mga nagpirma sa People’s Initiative form na pabor sa Charter Change o Cha-Cha sa Bicol.
Sa intrevista kan Brigada News FM Legazpi kay COMELEC Regional Director Atty. Ma. Juana Valeza, sinabi kaini na an nasambit na probinsya, igwa na nin 18.85%, kun saen nakua kan terser distrito an 24.58%; an segundo distrito igwa nin 16.51%, mantang 14.49% an nakua kan primer distrito.
Segun pa kay Valeza, an Albay asin Sorsogon sa bilong na rehiyon an haros kumpleto na o nakakua na nin sobra sa 3% voting population sa kada distrito.
Mientrastanto, an Masbate sana an wara pang paghiro o dae pa su boot nagkakaigwa nin signature sheet mantang an iba pang lugar sa kada probinsya sa rehiyon, hababa pa an porsyentong pabor sa Cha-Cha.