LEGAZPI CITY – Kumpirmado sa datos kan Department of Health (DOH) Bicol na an probinsya kan Albay an may pinakahalangkaw na kaso nin rabies sa bilog na rehiyon ngunyan na taon 2024.
Basado sa datos, anom na kaso na an nairehistro sa probinsya, as of January 1 hasta March 9 kan taon.
Kun ikukumpara naman sa kaparehong peryodo kan nakalihis na taon, wara ki nairehistrong kaso sa probinsya.
Mientras, nagresulta man an mga kaso sa probinsya sa 100% na increase kapareho kan Camarines Norte na may duwang nairehistrong kaso, asin Sorsogon na may sarong kaso.
Mantang, may 60% decrease naman sa Camarines Sur na may duwang kaso sa presente hale sa limang kaso kan 2023.
Mientrastanto, wara ki nairehistrong mga kaso sa mga probinsya kan Catanduanes asin Sorsogon.
Sa kabilugan, nasa 12 kaso nin rabies an nasa rehiyon na igwa nin 100% increase.
Padagos naman an pangapodan kan ahensya na tulos magpabakuna sa pinakaharaning Animal Bite Treatment Center makalihis na makagat nin hayop nganing maibetaran an anuman na mga nakakagadan na kahelangan.