LEGAZPI CITY – May mga preventive measures an mga personahe asin caretakers kan Albay Wildlife Park manungod sa tamang pag-ataman kan mga hayop ngunyan na dry season.
Sa intrevista kan Brigada News FM Legazpi kay Dr. Franz V. Colambo, Officer-in-Charge kan wildlife, sinabi kaini na nakaantabay asin preparado sinda para sa mga medikal na pangangaipuhan kan mga hayop nganing maibitaran an heat stroke asin mga helang na kawsa kan matinding init nin panahon.
Nagkokondusir man nin aldawan na pagkarigos, pag-monitor asin routine cleaning sa mga bahugan asin tubigan kan mga hayop nganing mamantenir an kalinigan asin maprotehiran an mga hayop kontra sa kahelangan.
Dugang pa ni Colambo, bastante an suplay nin tubig sa wildlife asin wara man ki naeeksperyensyar na kakulangan sa water system huli ta saro ini sa primerong kaipuhan kontra sa heat stroke partikularmente sa mga reptiles asin mammals.
Mientrastanto, pigtawan-duon man ni Colambo, importante an pagprotehir kan salud kan mga hayop. | Brigada Intern HANNAH JAMILA BITAGO