LEGAZPI CITY – Presente nang nakikipagtabangan an Albay Provincial Health Office (PHO) sa Provincial Veterinary Office nganing mas mapakusog pa an mga libreng anti-rabies vaccination sa mga atamang ayam asin ikos. Ini makalihis na makapagrehistro an probinsya nin apat na kagadanan huli kan rabies.
Segun kay PHO head Dra. Estela Zenit, kadaklan sa mga biktima, nakagat nin ayam alagad dai man nagpatudok nin bakuna.
Importante kaya na matudukan tulos nin bakuna kontra rabies an nakakagat nin ayam maski pa daing nahiling na anuman na lugad o gasgas orog na kun may nawalat na liwoy kan hayop.
Segun pa kay Zenit, may mga insidente kaya na minaabot sa bulan o taon antes mailingan nin mgan sintomas na may impeksyon nin rabies.
Mientrastanto, inako man ni Zenit na napundo an free vaccination ninda kan nagkapandemya, alagad ngunyan mas pig-iinguwa ninda sa probinsya na mapakusog an pagbakuna sa mga ayam asin ikos.