LEGAZPI CITY – Nakisumaro an Albay Provincial Health Office (PHO) sa pagtatao nin serbisyong medikal sa pangengenot kan Bicol University (BU) sa isinagibong ‘Operation Sci-Heart: CS-URING SMILE AND love HEALTH’ sa Barangay 59 Puro, Legazpi City.
An nasambit na aktibidad katakod kan pagseselebrar kan Science and Technology month na pinangenotan kan College of Science Student Council kan nasambit na unibersidad, gobyerno-lokal asin iba pang stakeholders na nagtarabangan nganing maisagibo an medical mission.
Obheto kaini na mapalawig pa an kaaraman sa dental health education asin pagtatao nin kinakaipohang medical asin dental na serbisyo sa mga komunidad.
Bilang pagpapahiling nin suporta kan gobyerno-probinsyal sa proyekto, nagtao nin manlaen-laen na serbisyong-medikal an PHO sa pangengenot ni Dra. Estella Zenit, sa mga residente kan nasambit na barangay kun sain tinukar sa mga ini an importansya kan pagkuwa nin mga healthcare asin science-related careers.