LEGAZPI CITY – Katakod kan nagdadakol na numero kan mga nabibiktima nin paputok sa rehiyon kan Bicol orog na antes mag-Pasko, may pangapodan an Albay Police Provincial Office (PPO) sa publiko dapit sa naggagaramit kaini.
Kun pagbabasehan kaya an datos kan Department of Health (DOH) Bicol, improvised boga o kanyon an kadalasang kawsa kan mga injuries kan mga biktima sa rehiyon.
Segun kay PPO Chief Public Information Officer PCapt. Kharren Formales, an nasambit na klase nin paputok na DIY, dipisil ma-detect kan mga kapulisan.
Kadaklan kaya kaini, pigigiribo sa laog man sana kan mga harong. Kaya, para sainda, an pinakamagigibo ninda iyo an daing pundong information dissemination dapit sa maraot na epekto kaini asin saro sa mga pigbabawal kan mga otoridad.
Kaibahan man digdi an pangapodan asin pag-ingganyar ninda sa publiko na i-report sa saindang opisina kun may ma-witness na may naggagaramit nin improvised boga nganing marekas man na magibuhan nin aksyon.
Mahigot man an pagiromdom kan opisina, likayan na sana an paggaramit ki manlain-laing paputok nganing ligtas na makapagsabat sa Bagong Taon.