LEGAZPI CITY – Target kan Albay Provincial Tourism Culture and the Arts Office (APTCAO) na maisabay na sa World Heritage list ang Bulkang Mayon.
Segun kay Dorothy Colle, namamayo kan nasambit na opisina, huli kaini, pig-iinguwa ninda ngunyan na makua an suporta kan mga parasurat hale sa Department of Education, Bicol University asin manlaen-laen na ahensya de gobyerno nganing makatabang sa saindang target.
Sa oras na magsuporta an mga ini, dakulang tabang na su boot ini na makakalaog sa World Heritage List an bulkan huli ta saro ini sa mga rekisitos kan mga validators kan United Nations Educational, Scientific and Cultural Organization (UNESCO).
Dugang pa kaini, importanteng maipahiling sa validators an Outstanding Universal Value kan Mayon nganing syertong makakapasar ini sa balidasyon asin konsultasyon.
Pigsabi pa Colle, dakulang onra ini sa gobyerno-probinsyal sa oras na makasabay an Mayon huli ta mapapalangkaw kaini an turismo asin pwedesir su boot na madugangan an pondo para sa pag-aatamanan sa palibot kan bulkan.
Kun magigirumduman, taon dos-mil-disi-syete, saro an Albay sa nagin nominado para sa Mayon alagad dae ini nakapasar sa UNESCO FRANCE.