LEGAZPI CITY – Tinawan-doon kan Albay Provincial Treasurer Office (PTO) an importansya kan saindang mahigot na koleksyon kan real property tax sa mga lokal na gobyerno sa probinsya.
Segun kay Provincial Treasurer Mayflor Atos-Deang, bako sana ini nganing mas mapalangkaw an koleksyon kan gobyerno-probinsyal, kundi huli ta igwa ini nin dakulang tabang partikularmente sa mga estudyante asin mga residente.
Sinabi niya, dakulamg porsyento hale sa pinaka-stable na revenue kan probinsya sa real property tax sa irarom kan local revenue, pig-alokar para sa school board.
Kaibahan sa piggagamitan kaini an pagpapakarhay o repair kan mga eskwelahan, mga parke, scouting, Brigada Eskwela asin iba pa.
Magigirumduman na puon kan Enero hasta Setyembre ngunyan na taon, labi sa PHP36M na an nakokolektar o share kan gobyerno-probinsyal hale sa real property tax asin piglalaoman pa na madudugangan ini hasta sa matapos an mga masunod na bulan.