LEGAZPI CITY – Bilog an suporta kan Albay Electric Cooperative (ALECO), Inc. sa mga Albayano ngunyan na Semana Santa.
Bilang parte kan Oplan Semana Santa 2024, sinda an preparadong magtao nin duruderetso asin warang pundong supply nin kuryente nin huli ta dakol na mga Albayano an minaduman sa manlain-lain na mga simbahan asin iba pang imprastraktura.
Pigsiyerto kan ALECO, an saindang Technical Services Department, sa pakikipagtabangan sa Member Services Division, magkakaigwa nin task force na matutok sa pagpautob kan mga komprehensibong lakdang na may kinaraman sa power supply.
Kaibahan sa mga lakdang na ini an pag-inspeksyon kan distribution lines, load monitoring of transformers, pakikipagkoordinar sa Incident Management Teams kan mga LGU pati naman an mga naka-standby na crews sa unscheduled power interruptions.