Patay na nga miabot sa opsital ang usa ka amahan nga gipusil atubangan mismo sa ilang panimalay alas-4:40 sa hapon niadtong Enero 23, 2024 sa Sitio Lumondao, Brgy Marilog, Marilog District ning syudad.
Giila sa Marilog Police Station ang mga biktima nga sila Gil Peraales Paican, 32 anyos ug alyas Ai-Ai, 14 anyos nga susamang nanimuyo sa nahisgutang lugar.
Sa imbestigasyon, gi-snipe ang biktima ug gituohang gigamit nga armas sa wala pa ilhing mga suspetsado mao ang M16 rifle.
Rason nga wala na natabang pa ang biktima samtang anak niini ang padayon pang ginapaalim sa Isaac Robillo Hospital, Calinan, Davao City human nakahiagom kini og samad pinusilan sa iyang tiil.
Paspas pa nga misibat ang suspek nga sakay sa gituohang itom nga SUV nga nakitang naka-park sa pikas bahin sa maong highway.
Una nang gikanayon sa nakasaksi nga si alyas Marlon, 40 anyos nga naglingkod-lingkod lamang ang mga biktima atubangan sa ilang panimalay kilid sa National Highway, apan kalit na lamang sila nga nakadungog og buot sa armas. Sa eksklusibong pakighinabi kang PMaj Nelson Violan Jr., Station Commander sa Marilog Police Station, kalakip sa gitutokan nila karon nga posibleng motibo sa pagpusil sa biktima nga kanhing drug surrenderee ug miyembro sa rebeldeng grupo ingun man ang kasamtangan niining trabaho isip security escort.