Amaon, kulong sa panlulugos sa 3-anyos na sobrina sa syudad nin Tabaco

BNFM BICOL—Kulungan an binagsakan kan 44-anyos na si alyas “Rod” kan Purok 7, Relocation Site, Brgy. Salvacion, Tabaco City makalihis ining maarestar sa kasong panlulugos sa saiya mismong sobrina.

Sigun sa report kan Albay Police Provincial Office, an akusado nahahampang sa kasong pagbalgar sa Article 266-A o Rape Through Sexual Assault sa lindong kan Republic Act 8353 o “The Anti-Rape Law of 1997”.

Dinakop ini sa residensya kaini sa Brgy. Salvacion bandang alas 3:45 nin hapon sa paagi kan Tabaco City Police Station.

Sa testimonya suboot kan biktima, nangyari an panlulugos sa sainda mismong kwarto sa Barangay San Lorenzo, Tabaco City, alas 10:20 nin aga kan Hunyo 28, nakaaging taon.

Ginibo suboot ini kan akusado mantang nasa luwas an ina kan biktima kun sain pinatinakot suboot kaini an aki gamit an kutsilyo saka ginibo an panlulugos.

Wara nin piyansang ipigtalaan an korte para sa paramientras na libertad kan akusado. Oras na mapatunayan na ini nagkasala, pwedeser ining maatubang sa 20 sagkod 40 taon na pagkakakulong.#

Leave a Reply

Your email address will not be published. Required fields are marked *